Femu a Corsica
Ghjovi u 4 di Dicembre 2014

Quistione à bocca posta da Saveriu Luciani, à nome di u gruppu Femu a Corsica : Xylella fastidiosa - Dumanda di misure urgentissime


Quistione à bocca posta da Saveriu Luciani, à nome di u gruppu Femu a Corsica : Xylella fastidiosa - Dumanda di misure urgentissime
Mese fà, u nostru gruppu v’hà postu una quistione à bocca in sessione nant’à u batteriu Xylella fastidiosa chì si rode l’aliveti di u meziornu urientale di a penisula taliana.

Listessu ghjornu, l’eletti di st’Assemblea vutavanu a muzione di Femu A Corsica chì dumandava d’interpelà u Statu francese è l’Auropa, fenduli piglià à tramindui unepoche di misure preventive d’urgenza. Ma per faccila più corta, ùn accosteremu quì u so cuntenutu tecnicu.

In lu frattempu, l’ODARC hà urganizatu a participazione d’una delegazione corsa à u simposiu di Gallipoli (22 è 23 d’ottobre di u 2014), cità situata propriu in core di a zona infettata, è u Sgiò Prefettu hà pigliatu un‘arrestatu chì, a sapete, ùn basta mancu à pena, s’ellu ùn hè per fà crede chì « u Statu face qualcosa ».

Cusì chì, a simana scorsa, simu andati à stu scontru internaziunale chì addunia centinaie di scientifichi, prufessori è universitarii auropei è americani, cum’è per indettu Alex Purcell, di l’Università di Berkeley, o i prufessori Francesco Boscia, di l’Università di Bari è Domenico Bosco, di l’Istituto di Virologia vegetale di Torinu. Simu andati per senteli, ma dinò per vede i danni cagiunati à l’alivi salentini.

Chì custattu ? Per via di u ritardu è di l’ineficacità di e misure pigliate da a Regione Puglia è da u Statu talianu, a xylella fastidiosa hè in traccia di ruvinà un’ecunumia è un patrimoniu multiseculare aldilà di u Salentu,. Peghju, u curdone sanitariu messu in attu ùn para nunda è s’allarga miraculi a zona infettata, cundannendu à morte allocc’à pochi mesi i 50 milioni d’alivi pugliesi, è cun’elli l’amanduli è i quarci di i cuntorni.

Sapemu infine da l’americani chì stu batteriu ùn si pò stirpà ma solu mezi per circà d’arreghjelu.
Fattu si stà ch’ingiru à Lecce, ciò ch’elli chjamanu i spezialisti taliani « Complesso di dissicamento rapido di l'olivo », in termini scientifichi CODIRO, e lege o l’omi lu ùn sanu nè parà nè cunfinà.

S’hè cunclusu u simposiu di manera bella chjara : u batteriu arreca oramai a pena in capu à l’urganisimi sanitarii auropei (EFSA, EPPO, ecc.) è diventa una primura maiò per i stati di u Mediterraniu.

Voli sì voli nò, a dimu stamane quì, simu oramai à l’orlu d’una catastroffa sanitaria è eculogica ch’hà da impuzzichisce prestu prestu l’Auropa sana. È s’è n’andemu bè, vole dì chì stu periculu murtale francherà, à cortu andà, u mare per inceppassi in Corsica.

S’ellu ùn si face nunda è s’omu aspetta torna, ciò ch’ellu accade oghje quallà, hà da accade ind’è noi, è più in furia ch’omu crede.

O Sgiò Presidente, i corsi temenu di vede ammalassi è more i so alivi, l’arburatura, l’ambiente è l’ecusistemi isulani.

Tandu, ancu s’è a cumpetenza ferma parigina, u scopu di l’eletti di a Corsica ferma quellu di a messa in ballu d’una pulitica fittusanitaria efficace è perinnizata.

Stamane dunque ci addirrizzemu à tempu à u Presidente di l’Esecutivu ma dinò à quelli di l’ODARC è di l’Uffiziu di l’Ambiente.

In cunsequenza è sempre in cunfurmità cù a nostra muzione vutata mese fà, vi dumandemu s’è vo site pronti à :

- Interpelà Parigi è l’irlandese Phil Hogan, Cummissare Auropeu di l’Agriculturea è u Sviluppu rurale, nant’à l’urgenza per l’isula d’una derugazione ristrittiva di pettu à l’impurtazione di vegetali, è tant’altre misure cum’è per indettu messa in quarantana o cuntrolli rinfurzati ?

- Indià un’azzione pulitica forte contr’à u batteriu, almanacchendu subitu una campagna d’infurmazione è di sensibulisazione generalizata nant’à sta quistione sanitaria ?

- Urganizà à cortu andà cù i servizii di l’ODARC è di l’Uffiziu di l’Ambiente, i servizii di l’Agricultura, l’urganisimi prufesiunali, l’INRA è l’Università di Corsica, in leia cù l’ANSES è l’EFSA, un diagnosticu fittusanitariu territuriale, per sapè s’è u batteriu hè digià quì o nò ?

- Cuurdinà una « cellula di crisi », à tempu dinò di cuntrollu è di cura cù l’urganisimi citati più sopra ?

- Mette à l’ordine di u ghjornu di a Cummissione di e cumpetenze legislative è regulamentarie, in u quatru di a riforma di u statutu di l’isula, stu capatoghju di a cumpetenza sanitaria ?

A dicianu l’antichi : « À ch’hà tempu ùn aspetti tempu ! ». Hè ora di fà, di fà in furia è di fà in veru.

À ringraziavvi.

* Sta quistione à bocca posta era privista à a sessione di i 30 è 31 d'uttobre
Femu a Corsica

Cantunale | Assemblea di Corsica | Cantunale 2011 | Assemblea di Corsica : Quistione à bocca | L'eletti | Assemblea di Corsica : Muzione | A lèttera | Elezzione | Attualità | Istituzioni | Législatives 2012 | Présidentielles françaises | Municipales Aiacciu 2015 | TARRITURIALI DI 2015 | U Filu di a Storia | Custruì una sucietà libera | Inizià u Riacquistu Ecunomicu | Elezzione legislative 2017