Femu a Corsica
Ghjovi u 5 di Ghjugnu 2014

Questione di u nostru gruppu nant´à a furmazione prufesiunale

Dumanda d'una sessione specifica è di misure cuncrete à cort'andà.


Questione di u nostru gruppu nant´à a furmazione prufesiunale

O sgiò Presidente, 

 

Sta questione di u nostru gruppu  nant´à a furmazione prufesiunale

Hè in fatti a dumanda d'una sessione specifica è di misure cuncrete à cort'andà.

 

St´ultimi ghjorni, ci anu chjamatu parechji urganisimi di furmazione prufesiunale inchieti di pettu à u fattu ch´ella venga ritirata a chjamata d'offerte in u so settore. S'omu ne  caccia  certi induve ci sò lotti attribuiti nant´à dui o trè anni, o puru d'altri chì patenu una  calata significativa di u so bugettu, ch´ella mi sia cuncessa di mentuvà un particulare, particulare sì chì palesa per disgrazia una situazione generalizata, voglia vene à dì e dificultà di a furmazione per indettu u CFA di Furiani, o in l'agricultura, quella di u CPS de Corti, i CFPPA di U Borgu è di Sartè, senza scurdacci dinò di i licei agriculi. Per elli, nisun visibilità inquant´à l'appruntera di a prussima rientrata, a scarsia per ciò chì tocca a carta di e furmazione agricule, vale à dì, per un giovanu ,  l'impussibilità di stallassi senza BPA o BPREA, è, perfine,    a rimessa in causa, peghju, a disparizione di u CPS. 

 

Ùn ci serà po nimu quì stamane chì possa scopre l'affare : tutt´ognunu sà ch´ella ci vene d'un bugettu cusì dettu di rigore è basta.

Cù sta situazione si pò dì pessima per a maiò parte di st´urganisimi, ch´anu da esse e scelte pulitiche da fà à prò d'una furmazione puntellu di primura, ci pare, di u sviluppu ? 

 

Parechji dati ci imponenu una reazzione:

U statu calamitosu di l'ecunumia corsa riguardu à l'impiegu in generale - l'ultimi sciffri di u disimpiegu sò spripusitati per ùn stà à dì storichi: guasi 20.000 persone in cerca, cù una crescita di 10,4% in l'affare d'un annu, 

A debbulezza strema di u livellu di qualificazione di a pupulazione : 60,2 % di i  giovani trà 18 è 21 annu scularizati per 68% in Francia,

U percentuale u più bassu di quelli chì facenu a scelta di cuntinuà studii superiori : 48 % per  60 % in altrò,

Rivenuti quì dinò bassi bassi. In u 2010 un rivenutu mezanu 10 per centu più sottu chè ind´è l'altri. In fin' di contu, una situazione chì ci arreca a miseria in piazza, è forse dumane, à meza casa.

 

Si sà chì solu u sviluppu di e cumpetenze pò accumpagnà u sviluppu d'attività nove in stu paese. Hè torna stu sviluppu ch´hà da permette un'inserzione migliurata  nant´à u mercatu di u travagliu, è cusì,  via via, cuntribuisce à u sviluppu economicu di stu paese. 

 

Chì cuntate di risponde à tutti l'urganisimi di furmazione belli inchieti, chì temenu per oghje, è per dumane ? Chì diavule rispunderete à ste centinaie di giovani in  sottuqualificazione,  à quale  ùn li si prupone più nunda, manca a minima  furmazione ?  

 

Ci pare urgente sì è propiu di primura l'apertura à cortu cortu andà di u dibattitu di a furmazione di l'omi in Corsica. Per contu nostru, hè più chè ora di cunsacrà una sessione pulitica specifica nant´à sta tematica, è, à listessu tempu, d'apre una cuncertazione tecnica è pedagogica ver di tutti l'attori; quessa, capimuci bè, nanzu di caccià u prussima Pianu Regiunale di Furmazione. 

 

A risposta, quella ch´omu aspetta stamane, ci vole ch´ella possa rassicurà l'attori di a furmazione prufesiunale, in Aiacciu, in Bastia, in Balagna, in Corti, in piaghja, in Portuvechju, in Borgu, in Sartè è in altrò, à quelli  dinò chì travaglianu à favore di a ruralità è di l'agricultura, perfine à a nostra giuventù, quella chì canta in i Carrughji "simu di stu paese ci vulemu campà", st a giuventù chì spera di campà cù dignità nant´à a so terra.

 

Vi ringraziu.

Femu a Corsica

Cantunale | Assemblea di Corsica | Cantunale 2011 | Assemblea di Corsica : Quistione à bocca | L'eletti | Assemblea di Corsica : Muzione | A lèttera | Elezzione | Attualità | Istituzioni | Législatives 2012 | Présidentielles françaises | Municipales Aiacciu 2015 | TARRITURIALI DI 2015 | U Filu di a Storia | Custruì una sucietà libera | Inizià u Riacquistu Ecunomicu | Elezzione legislative 2017