Femu a Corsica
Venari u 13 di Dicembre 2013

Pulitica culturale : Identità è Cultura, pilastri di u sviluppu !

Dumanda à bocca posta da Mattea Lacave, Saveriu Luciani, Ghjacintu Vanni
A NOME DI FEMU A CORSICA


Pulitica culturale : Identità è Cultura, pilastri di u sviluppu !

« PULITICA CULTURALE »

 

O Sgiò presidente

 

In a so deliberazione  N° 12/132 DI U 26 DI LUGLIU DI U 2012 chì trattava di l’urientazione maiò di u PADDUC,  l’Assemblea di Corsica dichjarava chì l’identità è a cultura corsa eranu dui pilastri,  à prò di u sviluppu è di l’apertura nantu à u Mondu. 

U « fogliu di strada  culturale » parlava, inquant’à ellu, di prumove a creazione è a sparghjera di a cultura corsa. Oghje, à chì ne simu ? 

Sò crisciuti in pochi anni l’associi cunvenziunati, da 4 à 27. Segnu forse ch’ellu ci hè un antru sguardu ver di stu Mondu di a Cultura, in cunsunenza cù l’azzione forte purtata da a CTC in i duminii di a lingua è di u patrimoniu. 

 

Fattu si stà quantunque chì stu mondu culturale si face sente di manera cullettiva, è palesa i so penseri in sta fine di u 2013. Iè, inchietudine per dumane è dopudumane, ch’elli sianu associi cunvenziunati o nò, di pettu à e so prugrammazione, l’incertezza di i finanzamenti, tira avanti è tocca… In fin’ di contu, si pò teme oramai di vedene unepochi minacciati di disparizione, o per u più custretti di gestisce altrimente, à cortu andà, a so azzione. S’ellu ùn si parla ancu di calata generalizata di l’aiuti, da a parte di tutte e cullettività, si ponu misurà e cunsequenze, per indettu prugrammi ristretti, artisti è intervenenti licenziati, stazii è attelli annulati. 

 

Chì ci dicenu st’associi : per parechji, ch’elli ùn capiscenu mancu à pena a manera di purtà a pulitica culturale territuriale, ch’elli sianu cunvenziunati quì dinò o micca. Dicenu dinò ch’elli ci sò ritardi tremendi di pagamentu o sippuru ancu calate.  Per un dettu certi associi cunvenziunati ùn anu micca ricevutu a tutalità di ciò ch’ella avia previstu a cunvenzione, è senza ch’ella ci fussi a minima spiegazione. 

 

D’altronde,  un prugettu cù un cartulare postu in u 2012 per un azzione in principiu di u 2013 vi vene pagatu, s’ella li và bè, in u 2014. Sti ritardi cagiuneghjanu prublemi ammentati più sopra è chì mettenu in periculu di morte ste strutture. Di l’associi ch’intervenenu in e scole, ùn ne parlemu : si sò visti cambià e mudalità d’attribuzione di u finanziamentu senza essene prevenuti è ecculi chì correnu per limusinà cofinanziamenti da pudè per esse in regula cù u novu funziunamentu.

 

Compieraghju quì a litania di tuttu ciò ch’ùn và micca è chì vale dimustrazione : ùn si tratta solu quì di capatoghji finanziarii è di ritardu di pagamentu.. Si dumanda una migliurazione significativa di i canali di decisione, d’accelerazione di e struzzione di cartulari è di calendariu. Si tratta quì di pulitica culturale.. 

 

A dumanda di Femu A Corsica serà dunque in trè :

 

Chì cuntate di fà per rigulà à u più prestu i prublemi numerosi scontri da l’attori culturali ?

 

Sariate prontu à organizà l’assisi di a cultura cum’è l’aviamu dumandatu in principiu di mandatura, è di creà un spaziu ufficiale di scambiu è di pruposta cum’elli esistenu in altrò, induv’elli si chjamanu « cummissione per un spetaculu vivu » ?

 

Chì cuntate di fà per mette in anda una cuncertazione cù u mondu culturale, da avvià una vera pulitica culturale à prò di a creazione è di a diffusione di a cultura corsa ?

Femu a Corsica

Cantunale | Assemblea di Corsica | Cantunale 2011 | Assemblea di Corsica : Quistione à bocca | L'eletti | Assemblea di Corsica : Muzione | A lèttera | Elezzione | Attualità | Istituzioni | Législatives 2012 | Présidentielles françaises | Municipales Aiacciu 2015 | TARRITURIALI DI 2015 | U Filu di a Storia | Custruì una sucietà libera | Inizià u Riacquistu Ecunomicu | Elezzione legislative 2017