Femu a Corsica
Luni u 28 di Nuvembre 2016

Dumanda à bocca, posta da Nadine NIVAGGIONI : U batteriu Xyllela fastidiosa : À situazione impeghjurita, misure rinfurzate !


Dumanda à bocca, posta da Nadine NIVAGGIONI : U batteriu Xyllela fastidiosa : À situazione impeghjurita, misure rinfurzate !
Madama a Presidente di l’Uffiziu di l’Ambiente, Sgiò Presidente di l’Esecutivu di Corsica,

A situazione tantu temuta, hè accaduta : un casu di u ceppu Pauca nant’à un Polygala hè statu identificatu in Menton, mentre ch’ell’era classificatu, à e prime analisi, Multiplex.

A cumbinazione da Multiplex ver di un antru ceppu hè oramai da piglià in contu ; moltu più, chì tutti i casi di xyllela scuperti in Corsica sò Multiplex. 

Da u 26 d’aostu di u 2014, avemu dumandatu à u Statu di piglià misure adatte à u risicu maiò di catastroffa sanitaria, ecologica è economica. Vi rammentu chì a xyllela dissuchja l’alivi, ma dinù, a vigna, e lecce, i quarci, l’amanduli, l’agrumi, u furaghju, e piante urtulane é di urnamentu. Mette in periculu l’equilibriu sanu sanu di i nostri ecosistemi isulani.

Cù a calata di a mubilisazione pupulare, e misure di u Statu sò state allenate :
 
- E dirugazione à l’arrestatu di u 2015 nantu à l’impurtazione di e piante é di l’arburi sò cresciutie in veru : 171 dirugazione per vegetali specificati in lu 2015 è 687 in lu 2016 ; per i pianti d’alivi: 1403 in lu 2015 é 5921 in lu 2016. Mentre chì l’oleicultori corsi hanu organizatu a so propria pruduzione d’alivi.
- I cuntroli à i porti é à l’aeroporti sò di più in più scarsi é custosi secondu u Statu.
- A cumunicazione, ne si sente, ne si leghje.
- E riunione misinche in Prefettura, sò piantate.
 
E proposte fatte da u Statu à l’ultimu CROPSAV c’impenseriscenu assai è un rispondenu micca à u risicu altu di cuntagione :
 
- Prevede di mette in Pumonte è Cismonte, duie strategie sferente d’intervenzione é à mezu, un curdone sanitariu,
- Intende cuntabilizà i casi d’infezzione è impedì di piantà ne zone cuntaminate.
 
In pettu à ‘ssa ligerezza, u gruppu Femu A Corsica, chì per contu soiu, rilancia a mubilisazione, vi dumanda :
 
- D’inervenne perchì u Statu pianti e dirugazione,
- Ch’ellu ripigli i cuntroli ni porti é aeroporti,
- Ch’ellu metti in opera di manera seria una cellula di crisi,
- Ch’ellu sparghji una cumunicazione larga nantu à a quistione sanitaria, in direzione di i passageri, è in i lochi publichi di l’isula,
- Ch’ellu travagli incù e regione di u meziornu di a Francia nant’à strategie cumune o cumplementarie di prevenimentu,
- Ch’ellu lanci a ricerca nantu à l’eculugia di l’insetti vettori di trasmissione.
 
Madama a Presidente di l’Uffiziu di l’Ambiente, Sgiò Presidente di l’Esecutivu, ne simu à i punti stremi é una mancanza di decisione forte pò purtà a Corsica à a ruvina.

Saremu à fiancu à voi per cunvince u Statu nant’à l’urgenza di e misure rinfurzate à piglià.

À ringrazia vi.
Femu a Corsica

Cantunale | Assemblea di Corsica | Cantunale 2011 | Assemblea di Corsica : Quistione à bocca | L'eletti | Assemblea di Corsica : Muzione | A lèttera | Elezzione | Attualità | Istituzioni | Législatives 2012 | Présidentielles françaises | Municipales Aiacciu 2015 | TARRITURIALI DI 2015 | U Filu di a Storia | Custruì una sucietà libera | Inizià u Riacquistu Ecunomicu | Elezzione legislative 2017